مفت کی خوشیاں

.

Happiness that cost Nothing

یہ ایک سچی کہانی ہے۔

بارہ جنوری2007 کی صبح ایک شخص ایک وائلن ہاتھ میں تھامے نیویارک کے ایک میٹرو اسٹیشن پہنچا. ایک خالی بینچ  پر بیٹھ کر اس نے وائلن بجانا شروع کر دیا. وہ ایک جمعہ کی سرد اور معمول کے مطابق ہنگامہ خیز صبح تھی. ہزاروں لوگ اس وقت اس میٹرو اسٹیشن پر تیزی سے گذر رہے تھے. وہ شخص مسلسل ایک گھنٹہ ایک کے بعد ایک مختلف دھن بجاتا رہا. اس نے کل چھہ سات مختلف دھنیں بجائیں مگر گذرتے لوگوں میں سے کسی نے اس کا نوٹس تک نہیں لیا. لوگوں میں سے زہادہ تر کام پر جانے کی جلدی میں تھے. ایک بوڑھا شخص اس وائلن نواز کے پاس اس کا میوزک سننے کو رکا مگر پھر چند منٹ بعد ہی اس کی ایک دھن بھی پوری سنے بغیر آگے بڑھ گیا.

کافی دیر وائلن بجانے کے بعد اسے پہلی ٹپ ملی. ٹپ دینے والی عورت اس کا میوزک سننے کے لیے رکے بغیر زمین پر رکھے اس کے ہیٹ میں پیسے ڈالتی ہوئی تیزی سے آگے بڑھ گئ. کچھ دیر بعد اپنی ماں کا ہاتھ تھامے گذرتا ہوا اہک تین سالہ بچہ اس کا سنگیت سننے کو رکا مگر اس کی ماں خاصی عجلت میں تھی اس نے اس طرح رک کر وقت ضایع کرنے پر بچے کو ٹوکا اور اسے دھکیلتی ہوئی دوبارہ چل پڑی.بچہ موسیقی سے متاثر نظر آرہا تھا مگر اس کی ماں کے پاس وقت بالکل نہیں تھا. وہ بچہ بار بار پلٹ کر وائلن بجانے والے کو دیکھتا رہا اور بالآخر چلاگیا. ایسا ہی معاملہ چند اور بچوں کے ساتھ بھی دیکھنے میں آیا مگر ان کے والدین بھی انہیں جلدی چلنے پر مجبور کرتے ہوئے بغیر رکے ساتھ لے گئے.

ایک گھنٹہ کے دوران صرف سات افراد محض چند منٹوں کے لیے اس وائلن بجانے والے کا سنگیت سننے کو رکے. پندرہ کے قریب لوگ اس کے ہیٹ میں ٹپ ڈالتے گذر گئے. اس صبح اسے کل تیس ڈالر ملے.

ایک گھنٹہ پورا ہوتے ہی اس نے وائلن بجانا بند کردیا. میٹرو اسٹیشن پر خاموشی چھا گئ مگر کسی نے اس خاموشی کو بھی نوٹس نہ کیا. کسی نے موسیقار کو تالیاں بجا کر داد دی نہ اس کی بجائی کی ایک بھی دھن ٹھیک طرح سنی. وہاں کوئ اسے جانتا تھا نہ جاننا چاہتا تھا مگر وہ وائلن نواز کوئی اور نہیں "جوشوا بیل" تھا.

وہ دنیا کے چند بہترین موسیقاروں میں سے ایک تھا. اس نے اس صبح موسیقی کی تاریخ میں چند سب سے مہنگی ترین فروخت ہونے والی دھنیں بجائی تھیں جن کی قیمت 3.5 ملین ڈالر تھی. میٹرو اسٹیشن پر اس دن اس لائیو شو سے صرف دو دن پہلے بوسٹن میں اس کا ایک کامیاب شو ہوا تھا جس میں ایک نشست کا ٹکٹ سو ڈالر کے عیوض فروخت ہوا تھا. میٹرو اسٹیشن پر واشنگٹن پوسٹ نے جوشوا بیل کے ساتھ یہ ایوینٹ منعقد کیا تھا.

یہ لوگوں کے ذوق, رجحانات اور ترجیحات کو جانچنے پرکھنے کے لیے کیا گیا ایک Social experiment تھا.

یہ شو عوام کی ایک بہت بڑی تعداد کے درمیان ایک عام سی جگہ پر غیر عمومی اوقات میں ایک گھنٹہ کے دورانیہ پر منعقد کیا گیا تھا.

اس تجربہ کے نتائج انتہائی حیران کن تھے جنہوں نے ہر ایک کو سوچنے پر مجبور کردیا.

ہم کیسے چیزوں کو دیکھتے اور ان کے بارے میں رائے قائم کرتے ہیں؟

ہم کیسے, کب اور کیوں حسن و جمال اور کمال فن کا اعتراف کرتے ہیں؟

ہم تب ہی چیزوں کو توجہ کے قابل سمجھتے ہیں جب ہم سے کرنسی میں ان کی قیمت وصول کی جارہی ہو۔.

اس صبح میٹرو اسٹیشن پر موجود لوگوں میں سے اکثر  جوشوا بیل کا لائیو شو سننے کے لیے قیمت ادا کرنے سے کبھی انکار نہ کرتے مگر اس وقت وہ اس قدر مصروف تھے کہ انہوں نے اپنے درمیان بلاقیمت پرفارم کرتے جوشوا بیل اس کی خوب صورت دھنوں کو توجہ کے قابل بھی نہ سمجھا۔

یہ بڑی تعجب خیز بات ہے. ہم روزمرہ زندگی کی مصروفیت میں اس طرح کی بے شمار چیزوں سے لطف اندوز ہونا فراموش کرجاتے ہیں. ہم سبھی کی زندگیوں میں روزانہ ہی ایسی کئ خوب صورت چیزیں ہمارے آس پاس موجود ہوتی ہیں مگر کیا ہم لوگ اس خوب صورتی کو سراہنے اس سے محظوظ ہونے کے لیے ٹہرنا پسند کرتے ہیں؟

کیا ہم اس طرح کسی موسیقار یا اس کی خوب صورت دھن سے لطف اندوز ہو کر اسے اس کے کمال فن کی داد دینے کے لیے تالیاں بجاتے ہیں؟ 

ہم میں سے کتنے اپنی روزمرہ کی مصروفیات کو (کچھ دیر کے لیے ہی صحیح) ترک کر کے اپنے اردگرد ماحول اور لوگوں پر توجہ دیتے ہیں؟

اس دن ہزاروں لوگ اپنے درمیان موجود عظیم موسیقار جوشوا بیل کے لائیو شو سے مفت لطف اندوز ہونے کا موقعہ گنوا بیٹھے. بالکل اسی طرح ہم بھی زندگی کی بہت سی چھوٹی چھوٹی خوب صورتیوں سے لطف اندوز ہونے کے بے شمار مواقع "آگے ہی آگے" بڑھنے کی دوڑ کا حصہ ہونے کے سبب گنوارہے ہوتے ہیں اور اس آگے بڑھنے کی کوشش میں زندگی کی اصل خوب صورتی کہیں بہت پیچھے رہ جاتی ہے.

تحریر: شاہدحبیب ایڈوکیٹ

کراچی. پاکستان