کامیابی کی پہیلی

Easy way To Success

زمانہ طالب علمی میں کھبی اساتذہ تو کبھی ہم جماعت اکثر دلچسپ سوالات

 اور پہیلیاں پوچھا کرتے تھے جن سے زندگی بھر کے لیے عقل و دانش سے بھرپور سبق ملتے تھے. اسکول کے زمانے میں اسی طرح کا ایک سوال ایک استاد نے ہم سے کیا تھا جب انہوں نے چاک سے بلیک بورڈ پر ایک لیکر کھینچی (تب وائٹ بورڈ اور مارکر کا رواج نہ تھا) اور پھر پوری کلاس کو چیلینج کیا کہ کون اس لکیر کو چھوئے یا مٹائے بغیر چھوٹا کر کے دکھا سکتا ہے؟ لکیر کو آگے یا پیچھے سے مٹائے بغیر ایسا کرنا ممکن نہ تھا مگر ٹیچر کی طرف سے تو اسے چھونے کی بھی اجازت نہ تھی.ہم سب شش و پنج میں پڑے ایک دوسرے کی شکلیں دیکھتے  رہے مگر کسی کے پاس اس معمہ کی سلجھن نہ تھی لہزہ تھوڑی دیر بعد ہی ہار مان گئے. تب ہمارے لائق استاد نے بلیک بورڈ پر اپنی کھینچی ہوئی لکیر سے ذرا نیچے ایک دوسری لکیر کھینچی جو پہلی لکیر سے کافی زیادہ لمبی تھی اور پھر پوری کلاس کو دیکھتے ہوئے  سوالیہ انداز میں جواب دیا "اب ہوگئ پہلی لکیر چھوٹی؟" تمام طالب علموں نے حیرت سے مسکراتے ہوئے اثبات میں سر ہلایا. اس سوال اور اس کے جواب میں ہم سب کی زندگیوں کو بدل دینے والا سبق پوشیدہ تھا جس کی وضاحت ٹیچر نے یوں کی کہ بحیثیت انسان دوسروں سے آگے بڑھنے اور ترقی کرنے کی خواہش ہماری فطرت کا حصہ ہے مگر اس خواہش کی تکمیل ہم دوسروں سے الجھے لڑے بغیر, ان سے حسد اور جلن میں مبتلا ہوئے بغیر, انہیں بدنام اور ان کے خلاف سازش کیے بغیر بھی کرسکتے ہیں اور اگر ہم یہ سب نہ کریں تو ترقی نہیں بلکہ غیر معمولی ترقی کرسکتے ہیں جس کے لیے ہمیں اپنی توانائیاں صرف اپنی ذاتی قابلیت, علم, صلاحیتوں اور خوبیوں کو بڑھانے پر صرف کرنا ہوں گی. اپنے قدوقامت میں اضافہ کرنا ہوگا اگر ہم حقیقت میں ایسا کرنے میں کامیاب ہوگئے تو ہم وہ دوسری بڑی لکیر ثابت ہوں گے جو پہلی لکیر کو چھؤئے بغیر چھوٹا کر دیتی ہے. یہی ترقی کا درست طریقہ ہے اور انفرادی اور قومی ترقی کا اس سے بہتر کوئی نسخہ نہیں. ہمارے بعد آزاد ہونے والے چین اور ایٹم بموں کی بارش سے تباہ حال جاپان کی ترقی اس حقیقت کا منہ بولتا ثبوت ہے.

دوسرا بڑا اور بہترین سبق ہمیں اس وقت سیکھنے کو ملا جب دسویں کے امتحانات کے قریب ہمارے اعزاز میں اسکول کی روایت کے مطابق 'الوداعی پارٹی' کا انعقاد کیا گیا جس کا انتظام سینئر ترین اور طلبہ اور اسٹاف میں یکساں مقبول ٹیچر ولی حسن قریشی صاحب کے ہاتھ میں تھا. لنچ کے بعد انہوں نے ہم پر "موسم کی مناسبت سے آپ سب کیلیے کشمیری چائے کا بھی انتظام ہے"  کا خوش گوار اعلان کیا. کچھ دیر بعد نائب قاصد گل حسن ہاتھ میں گرم کشمیری چائے کے 2 بڑے تھرماس کے ساتھ نمودار ہوا جس کی معاونت کرتے ہوئے نویں جماعت کے دو طالب علم اپنے ہاتھوں میں ٹرے پر بہت سے کپ بھی لے آئے جو سامنے میز پر رکھ دیے گئے. ایک عجیب بات سب نے نوٹس کی. زیادہ تر کپ بڑے خوب صورت, قیمتی اور نفیس تھے مگر ساتھ ہی کچھ کپ بہت سادہ اور کچھ تو پلاسٹک کے بھی بنے ہوئے تھے. استاد محترم نے طلبہ سے اپنی مدد آپ کے تحت چائے خود لینے کے لیے کہا. تمام طالب علم چائے لے کر اپنی جگہ واپس آگئے اور چائے پینے لگے اس دوران سر اپنی مخصوص اور شفقت بھری مسکراہٹ کے ساتھ ہم سے یوں مخاطب ہوئے "سادہ اور پلاسٹک کے کپ اپنی جگہ پر پڑے رہ گئے.آپ میں سے کسی نے بھی ان میں چائےنہیں لی. ہر ایک نے اپنے لیے نفیس اور قیمتی کپ ہی کیوں چنا؟" ہمارے تیز طرار مانیٹر جاوید اقبال نے بلاتوقف جواب دیا "جی ہاں. اپنے لیے بہترین کا انتخاب اچھے ذوق کی علامت ہوتا ہے". استاد محترم بولے "جی ہاں مگر یہ آپ کی زندگی کے بہت سے بڑے مسائل کی بنیاد اور ذہنی دباؤ کا ایک بہت بڑا سبب بھی ہے". سبھی نے حیرت سے پوچھا "وہ کیسے؟" انہوں نے چائے کا گھونٹ لیا اور مسکراتے ہوئے جواب دیا "آپ کو اصل میں جس چیز سے لطف اندوز ہونا تھا وہ چائے تھی کپ نہیں. پھر بھی آپ سب کی پہلی توجہ چائے سے زیادہ نفیس اور قیمتی کپ پر کیوں رہی؟". ان کی اس "کیوں" کا جواب بھی کسی کے پاس نہ تھا. چند لمحوں کے وقفہ کے بعدجواب اس بار بھی انہوں نے خود دینا شروع کرتے ہوئے کہا "میرے بچو. زندگی کا اصل حسن باطنی خوشیوں میں پوشیدہ ہے. مہنگا لباس, عالی شان گھر, قیمتی گاڑی, ملازموں کی فوج اور دولت کی ریل پیل کے سبب ملنے والے دوست آپ کے ہاتھ میں موجود قیمتی کپ کی مانند ہوتے ہیں. اگر قیمتی اور نفیس کپ میں چائے ہی بدمزہ ہو تو کون اسے پینا پسند کرے گا؟ پھر اس نفیس اور قیمتی کپ کی کیا اہمیت باقی رہ جائے گی؟ اسی طرح آپ کی زندگی, اچھی صحت, اچھی صحبت اور آپ کا اعلی کردار اصل اہمیت کے حامل ہیں. باقی سب چیزیں تو کراکری کی طرح ہیں جو ہلکی سی چوٹ بھی برداشت نہیں کرسکتے لہزہ توجہ چائے کے ذائقہ پر ہونی چاہئے قیمتی اور نفیس کپ پر نہیں. زندگی کے اصل معیار کو بلند کیجیے. اپنی ذہن پر کپ کا وزن مت لادئیے. 

چائےکا مزہ لیجیے۔

تحریر شاہد حبیب ایڈوکیٹ

+923332472648