یہ پاکستان ہے فرانس نہیں

     Sorry Mam,Motor way is not in France

 دنیا کے مختلف براعظموں اور ملکوں میں پھیلے وہ

 لاکھوں افراد جنہیں عرف عام میں اورسیز پاکستانی یا سمندر پار پاکستانی کہا جاتا ہے میری نظر میں بڑی عجیب و غریب مخلوق ہیں. یہ لوگ اپنی تعلیم ہنر اور قابلیت کی بنیاد پر ایڑی چوٹی کا زور لگا کر اپنا گھر محلہ گاؤں شہر اور ملک چھوڑ کر پردیس جاتے ہیں ان کی جدائی کادرد سہتے ہیں. اپنے رسوم و رواج ماحول معاشرت سے علیحدگی اختیار کرتے ہیں اور بالکل مختلف رسوم و روایات زبان تہذیب اور بودوباش  کے درمیان بادل نخواستہ زندگیاں گذارتے ہیں. ذرا سوچئے کیا اتنی بڑی قربانی کیا صرف پیسہ کمانے کے لیے دی جا رہی ہوتی ہے؟ اتنی بڑی قیمت کیا صرف معاشی منفعت کے حصول کے لیے ادا کی جارہی ہوتی ہے؟ کیا ان کا اپنا وہ ملک جہاں بیرون ملک سے لوگ پیسہ کمانے آتے ہیں معاشی اعتبار سے اتنا بانجھ ہوسکتا ہے کہ خود اپنے شہریوں کو خاطرخواہ روزگار نہ مہیاء کرسکے.پاکستان میں  جہاں سعودی, چینی, ترک اور ملائشین بلینز میں سرمایہ کاری کر رہے ہوں اور افغان ایرانی بنگلہ دیشی شہری کامیابی سے کاروبار اور ملازمت کرتے ہوں وہ پاکستان اپنے شہریوں کو روزگار نہ دے سکے. راقم خود ایسے اٹالین چائنیز اور سری لنکن شہریوں سے واقف ہے جو کراچی میں ٹیکسٹائل, گارمینٹس اور دیگر شعبوں میں کامیابی سے برس ہا برس سے سرمایہ کاری کر رہے ہیں تو سوال یہ پیدا ہوتا کہ ان حالات میں ایسے ملک کے اپنے شہریوں کا بیرون ملک منتقل ہونا کیا صرف پیسہ کمانے کے لیے ہوسکتا ہے؟

پاکستان سے یورپ, آسٹریلیا, مشرق بعید, شمالی اور جنوبی امریکہ اور یہاں تک کہ افریقہ کے مختلف ممالک میں یہ سمندر پار پاکستانی وطن میں رہنے والوں سے کہیں بڑھ کر محب وطن ہوتے ہیں. یہ اپنے ملک کے کے لیے فارن ایکسچینج یعنی غیرملکی زرمبادلہ کی آمد کا سب سے بڑا ذریعہ بلکہ اگر سادہ ترین الفاظ میں اگر کہا جائے کہ اپنے گھر (یعنی وطن) کے سب سے بڑے کماؤ پوت ہوتے ہیں تو بے جا نہ ہوگا.یہ یورپ اور امریکہ کی شہریت حاصل کےکر امریکی اور یورپی معاشروں کا حصہ بن کر وہاں کی سیاست میں پاکستان کی مفادات کا تحفظ کرتے ہیں۔پاکستان کے لئیے لابنگ کرتے ہیں۔پاکستان مخالفت لابی کی یلغار کے آگے سینہ سپر ہو جاتے ہیں۔پاکستان ،پاکستانیت اور پاکستانیوں کا ایک صاف ستھرا امیج دنیا کے سامنے پیش کرتے ہیں انہیں پاکستان کی زبان ادب و ثقافت سے روشناس کرواتے ہیں

غیر ملکی سرمایہ کاروں کو پاکستان میں سرمایہ کاری کے لئیے راغب کرنے کا ذریعہ بنتے ہیں رابطہ کار اور سہولت کار کا کردار ادا کرتے ہیں مگر بدلے میں اپنے ملک سے کیا صلہ پاتے ہیں؟؟

پاکستان میں ان کی غیر موجودگی میں ان کی جائیدادوں پر قبضے ہو جاتے ہیں.ان سے کثیر زرمبادلہ کمانے والی تمام حکومتیں انہیں انتخابات میں ووٹ کا حق اور پارلیمنٹ میں نمائندگی دینے سے نا معلوم وجوہات کی بنیاد پر صرفِ نظر کرتی آئیں ہیں۔ان سمندر پار پاکستانیوں میں سے بہت سوں کی تو دیار غیر میں تیسری نسل پروان چڑھ رہی ہے۔پاکستانوں کی یہ قسم عجیب مخمصے کا شکار نظر آتی ہے سمندر پار ہو کر بھی یہ پاکستان میں ہی رہنا چاہتے ہیں۔یہ اتنے محب وطن ہیں کہ اپنے وطن سے ترک وطن کرنے اور امریکی ۔برطانوی،فرانسیسی شہریت لینے کے باوجود اپنے نام کے ساتھ پاکستانی کا لاحقہ ضرور لگاتے ہیں ان میں سے بہت سے قانونی اور معاشی مجبوریوں کے سبب پاکستانی شہریت سے دستبردار بھی ہو چکے مگر ان میں سے کوئی بھی پاکستانی قومیت سے دستبردار ہونے کو  تیارنہیں اور دیار غیر میں پیدا ہو کر وہیں پروان چڑھنے والی اپنی دوسری اور تیسری نسل کو اپنی دینی اور قومی تشخص سے روشناس کروانےکے لیے لاکھوں ڈالر خرچ کرتی ہے۔ہر سال دو سال بعد یہ لوگ اپنے بچوں کو ساتھ لے کر پاکستان آتے ہیں۔وطن پہنچ کر رشتہ داروں کی حریص نگاہوں اور چہروں سے ٹپکتی ان کی ذاتی اغراض کو برداشت کرتے یہاں کے موسم کے گرم و سرد میں کبھی بجلی تو کبھی گیس کی لوڈ شیدنگ جیسے مسائل سے ناآشنا بچوں کو بھی یہ سب صبر سے برداشت کرواتے ہیں تو کبھی بے ترتیب اور نظم و ضبط سے عاری ٹریفک بلکہ مجموعی طور پر غیر منظم معاشرت اور قدم قدم پر آڑے آنے والی رشوت اور کرپشن کی دیگر اقسام کی غیر اطمینان بخش وضاحتیں دے دے کر اپنے بچوں کو مطمئن کرنے کی ناکام کوششیں کرتے دکھائی دیتے ہیں۔مگر یہ سارے کڑوے گھونٹ اس لئے پئے جاتے ہیں کہ جس حد تک ممکن ہو اپنے بچوں میں اپنی دین اور اپنی ثقافت کی رمق کو زندہ رکھا جاسکے۔امریکہ ،۔مشرق بعید اور یورپ کے نظم و ضبط  کے پابند اور قانون پسند معاشروں میں جنم لینے والے ان کے بچوں کو پاکستان پہنچتے ہی ایئرپورٹ سے گھر تک "پاکستانی مسلمانوں" کا جو چہرہ دیکھنے کو ملتا ہے وہ اس سے قطعی مختلف ہوتا ہے جسے دکھانے ان کے بڑے انہیں سمجھا منا کر یہاں لے کر آتے ہیں۔

فرانس میں مقیم ایک پاکستانی خاتون بالکل اسی طرح کچھ دن پہلے اپنے تین بچوں کے ساتھ اس خیال اور سوچ لئیے پاکستان آئیں کہ فرانس کے غیر اسلامی اور مغربی معاشرے میں پروان چڑھتے بچوں کو اسلامی اور پاکستانی اقدار و روایات سے آشنائی ہو۔ یہ خاتون عرصہ دراز سے فرانس میں مقیم ہیں جہاں وہ تنہا اور بغیر کسی محرم کے ہائی ویز پر رات گئے محفوظ سفر کی عادی تھیں ۔فرانس کے غیر مسلم معاشرے میں قوانین کے سخت نفاذ کے سبب ان کے اندر اتنی خود اعتمادی پیدا ہوچکی تھی کہ جو ہم پاکستانیوں کی نذدیک حد سے بڑھی ہوئی تھی۔ ہمارے ہاں رائج 'جرم ہونے کے بعد مجرم کی تلاش' والی حکمت عملی کے برعکس مغربی ممالک میں ہر شخص وہاں رائج پرو ایکٹو یعنی 'جرم کو ہونے نہ دینے' کی حکمت عملی کے سبب  ذاتی تحفظ کے حوالے سے بے تحاشہ  بے خوف نظر آتا ہے۔تو ان معاشروں میں رہ کر یہ سمندر پار لوگ بھول جاتے ہیں کہ وہ جس ملک سے جا کر وہاں آباد ہوئے تھے وہ اب بھی پاکستان ہی ہے۔وہی پاکستان جسے وہ دس،پندرہ ،پچیس یا پچاس سال پہلے چھوڑ کر پردیس گئے تھے۔مگر اس بار کچھ ایسا مختلف ہوا ہے کہ  سات سمندر پار رہ کر خود کو پاکستانی قرار دینے والوں کی کم از کم یہ غلط فہمی تو دور ہوجانی چاہئے.

یہ خاتون بھی پاکستان کی سڑکوں پر اسی اعتماد اور احساس تحفظ میں مبتلا تھیں جو غیر فرانس کے غیراسلامی  معاشرے کے نظم و ضبط اور قانون پسندی کے سبب ان کے لاشعور میں رچ بس چکا تھا. نصف شب کے بعد یہ خاتون اپنے تین بچوں کے ہمراہ براستہ موٹر وے سفر کرنے کی 'غلطی' کر بیٹھیں. دوسری غلطی یہ کی کہ ہمراہ کوئی بالغ محرم مرد نہ تھا اور اس پر طرہ یہ کہ پیٹرول بھی چیک کرنا بھول گئیں.  پاکستان میں ایک عورت کو اس قدر فاش غلطیوں کی سزا قانون نافذ کرنے والے ایک بہت بڑے ادارے پولیس کے ایک بہت بڑے اور باختیار منصب سی سی پی او پرفائز افسر (جن کی تعیناتی پر معترض صوبہ کے آئی جی کو گئے روز ہی تبدیل کیا گیا تھا) کے بقول تو پھر ملنا ہی تھی. راستے میں پیٹرول ختم ہونے کے سبب کار بند ہوگئ. انہوں نے گھبرا کر مدد کے لیے گوجرانوالہ میں اپنے ایک عزیز کو کال کی جو پاکستانی شہری ہونے کے سبب ان کی طرح پراعتماد نہ تھا لہذا اس نےمرد ہونے کے باوجود اتنی رات گئے اکیلے سفر کرنے کے بجائے  اپنے ایک دوست کو ہمراہ لیا اور خاتون کو ریسکیو سے رابطہ کرنے کے لیے کہا مگر یہاں وہ بھی غلطی پر تھا یہ مغربی ریسکیوورکرز کی طرح اطلاع ملتے ہی خاتون تک پہنچنے والے نہیں ہیں. ادھر پاکستان کی پولیس اور ریسکیو کی مستعدی اور عوام دوستی کی روایات سے واقف دو افراد ان سے زیادہ مستعدی سے بند کار میں اس خاتون اور ان کے بچوں تک پہنچنے میں کامیاب ہوگئے اور پھر پاکستان اپنے اسلاف کی دینی اور قومی روایات سے آشنائی کے لیے پاکستان آنے والے بچوں کی آنکھوں کے سامنے دو پاکستانیوں نےان کی آنکھوں کے سامنے ان اقدار کا مظاہرہ کیا جنہیں کسی بھی طرح حیوانی بھی نہیں کہا جاسکتا. یہ وہ سبق ان بچوں کو پاکستان کے اسلامی معاشرے میں پڑھایا گیا جو شاید انہیں فرانس کے کفریہ کلچر میں بھی پڑھنے کو نہ ملتا. اب ان بچوں کو پاکستانی روایات کے حوالے سے مزید کسی سبق کی حاجت باقی رہی ہوگی.

اس سارے قصہ میں جب پولیس کے کردار وکاروائی کا وقت آیا تو اس کے مزکورہ بالا زمہ دار ترین افسر کا بڑا واضح اور دو ٹوک موقف سامنے آیا. موصوف نے بجا طور پر اس سانحہ میں خاتون کی تمام غلطیوں کی بھرپور نشاندہی کرکے سانحہ کی ذمہ داری ان دو انسان نما حیوانوں کے کاندھوں سے اتار دی. خاتون کی طرف سے برتی گئیں ساری بے احتیاطی تو درحقیقت کسی بھی مرد کو گویا اس کے ساتھ من چاہا سلوک کرنے کا حق عطا کرتی ہیں. انھوں نے ٹھیک ہی تو کہا کہ آپ فرانس سے آئی ہیں وہاں گورنمنٹ کی رٹ ہے رول آف لاء ہے اخلاقی قدار ہیں وہاں آپ یہ غلطیاں کرنا افورڈکرسکتی ہیں. انہوں نے بالکل درست وضاحت کی "یہ فرانس نہیں پاکستان ہے" تو یہاں آپ کن اخلاقی اقدار, رول آف لاء اور گورنمنٹ کی رٹ کے آسرے پر اسطرح موٹر وے پر نکل آئیں. اس واضح اعلان نے تو سمندر پار کے ساتھ ساتھ ملک میں رہنے والوں کی بھی طبیعت صاف کردی ہے. اب جو اخلاقی اقدار, رٹ آف گورنمنٹ اور رول آف لاء جیسے عوامل کے تحت اور تحفظ کے احساس کے ساتھ بلاخوف وخطر زندگی گزارنا چاہتے ہیں آدھی رات کے بعد موٹروے پر پیٹرول چیک کیے بغیر سفر کرنا چاہتے ہیں تو وہ سب فرانس کا رخ کریں کیوں کہ "یہ فرانس نہیں پاکستان  ہے۔

تحریر: شاہد حبیب ایڈوکیٹ

+923332472648