بحث و تکرار _____ آپ کی اصل ہار

 مغل شہنشاہ اورنگ زیب عالم گیر کے حوالے سے ایک بڑا مشہور واقعہ ہم میں سے اکثریت کے مطالعہ سے گذرا ہوگا کہ ایک بار وہ کلام الہی کی کتابت میں مشغول تھا کہ پاس موجود ایک مہمان نے اس کی لکھی ایک آیت غلط قرار دے کر اسے دوبارہ درست لکھنے کے لیے کہا. شہنشاہ اورنگ زیب عالم گیر نے اول اول اپنی لکھی آیت کو درست قرار دیا جس پر مہمان نے بضد ہو کر اس آیت قرآنی پر اپنے موقف کو درست قرار دیتے ہوئے اسے دوبارہ ٹھیک طرح سے لکھنے کا مشورہ دوہرایا.  اس بار اورنگ زیب نے وہ آیت مٹا کر مہمان کی تجویز کے مطابق دوبارہ تحریر کردی جس پر مہمان کے چہرے پر طمانیت کے آثار نمایاں ہوگئے اور اس کا رویہ شہنشاہ کی جانب خوش گوار ہوگیا. کچھ دیر بعد جب وہ مہمان رخصت ہوا تو اورنگ زیب نے اس کے مشورے کے مطابق لکھی آیت کو مٹا کر دوبارہ اسی طرح تحریر کردی جس طرح اس نے پہلے تحریر کی تھی. مصاحبین نے حیران ہو کر دریافت کیا جہاں پناہ آپ نے تو اس شخص کے کہے کو درست تسلیم کر کے آیت تبدیل کی تھی تو اب آپ نے دوبارہ اس طرح کیوں تحریر کی جسے آپ غلط مان چکے تھے. شہنشاہ اورنگ زیب نے مسکرا کر جواب دیا کہ میں جانتا تھا کہ درست آیت وہی ہے جس طرح میں نے تحریر کی مگر چوں کہ وہ صاحب اپنی کم علمی یا کسی بھی اور وجہ کے سبب میرے لکھے کوغلط قرار دینے پر بضد تھے اس لئے اگر بحث و تکرار کرنے کے بجائے وقتی طور پر میں اس کے غلط موقف کو درست تسلیم نہ کرتا تو یقینی طور پر اس کی دل آزاری ہوتی اس کی انا اور احساس برتری کے جذبے کو ٹھیس پہنچتی اور وہ رنجیدہ ہوتا لہذہ میں نے اس کی تعظیم و تکریم کا لحاظ کرتے ہوئے اپنے لکھے کو مٹا کر اس کی تجویز کے مطابق تحریر کردیا جس کے نتیجہ میں وہ دربار سے خوش اور مطمئن رخصت ہوا۔.

اکثر و بیشتر مشاہدے میں آتا ہے  کہ کسی تقریب, دفتر, کلاس روم, گھر, دوستوں یا قرابت داروں کی محفل میں جب لوگ جمع ہوتے ہیں تو بعض اوقات کسی بھی معمولی سے معمولی موضوع پر بلاوجہ کی بحث و تکرار میں ایک دوسرے سے الجھ پڑتے ہیں اور بحث میں شریک ہر فریق خود کو درست ثابت کرنے کے لئے دنیا جہان کے دلائل کے انبار لگا دیتا ہے. تقریب خوشی کی ہو یا غم کی, اس طرح کی صورت حال کا ہمیں اکثر و بیشتر سامنا کرنا پڑتا ہے. بحث وتکرار میں الجھے فریقین یہ بھی یاد نہیں رکھ پاتے کہ وہ تقریب کو ماحول خراب کر رہے ہیں. سب سے خطرناک صورت حال تب پیدا ہوتی ہے جب کوئی صاحب کسی موضوع پر اپنی معلومات کو درست جان کر اپنا موقف بیان کر رہے ہوتے ہیں اور کوئی اور صاحب گفتگو کے خاص حصہ کو اپنی معلومات کے مطابق "غلط" جان کر درمیان میں مخل ہو کر فیصلہ سناتے ہیں "نہیں جناب. یہاں آپ غلط کہہ رہے ہیں.اس طرح درست نہیں." اب یہاں سے ماحول یک دم تبدیل ہوجاتا ہے اور ایک نئی بحث کا آغاز ہوجاتا ہے جسے حجت بازی کہنا زیادہ مناسب معلوم ہوتا ہے. ایسے لوگ یہ بالکل بھول جاتے ہیں کہ ان سے تو رائے طلب بھی نہیں کی گئی تھی نہ انہیں کسی نے اوروں کی معلومات و خیالات کے صحیح یا غلط ہونے کے فیصلہ صادر فرمانے کے لئے منصف یا قاضی مقرر کیا تھا. محفل میں سبھی ہماری طرح بطور مہمان شریک ہیں. ہمیں کیا ضرورت ہے کہ دوسروں کو جھوٹا اورغلط ثابت کریں. ہم بن مانگے رائے دینے کا حق نہیں رکھتے. کسی کی سجائی محفل کا حسن غارت کر کے ہمیں کچھ حاصل نہیں ہوگا. سب سے بڑھ کر بلاوجہ کی بحث و تکرار خود ہمارے اپنے مفاد میں بھی نہیں. حجت بازی سے ہمیشہ پرہیز کرنا چاہئے. بلاوجہ کے دلائل سے آپ کبھی کوئی بحث نہیں جیت پائیں گے. بحث جیتنے کا صرف ایک ہی طریقہ ہے. دلیل بازی سے مکمل پرہیز.اس سے کینسر اور ٹی بی کی طرح دور بھاگنا چاہیے. آپ دلیل کو نہیں حیت سکیں گے. آپ دلیل کو جیت بھی جائیں تو مان لیجیے کہ آپ ہار گئے. وجہ؟؟ فرض کیجیے کہ آپ مقابل کی ہر دلیل کو رد کرنے میں کامیاب بھی ہوگئے آپ نے اس پر فتح پالی اسے غلط بھی ثابت کر دیا تو آپ تو خوش ہوں گے مگر آپ کا مقابل؟؟؟اسے آپ کی فتح سے کتنی محبت ہوگی؟؟ آپ نے اسے نیچا دکھایا ہے اس کے غرور کو سرنگوں کیا ہے. اسے آپ کی جیت سے نفرت ہوگی.شدید نفرت اور بالآخر خود آپ کی شخصیت بھی اس نفرت کے نشانہ پر ہوگی اور عین ممکن ہے کہ سامعین میں سے کچھ آپ کے مقابل کے موقف سے متفق ہوں تو اندازہ کیجیے کہ آپ نے کتنے دلوں میں اپنے لئے منفی تاثر پیدا کیا. انسانی ذہن کبھی بحث و تکرار سے تبدیل نہیں کیے جاسکتے نہ ہی انسانی دلوں کو کج بحثی سے تسخیر کیا جاسکتا ہے.اپنے گھر,  خاندان, حلقہ احباب کی طرح ملازمت, کاروبار, دنیاوی لین دین غرض کسی بھی جگہ بحث و تکرار اور حجت آپ کو کوئی کامیابی دلانے میں مددگار ثابت نہیں ہوسکتی. انشورنس, مارکیٹنگ اور سیلز سے وابستہ کئی اداروں نے اپنے لیے ایک واضح پالیسی کا تعین کیا ہوا ہے اور وہ ہے "بحث مت کرو". کاروبار اور تکرار دو متضاد باتیں ہیں. آپ دلیل بازی, جھوٹے اور دوسرے کی مخالفت سے اگر کبھی کامیابی حاصل کر بھی لیں گے تو یہ بالکل بے معنی ہوگی کیوں کہ مدمقابل کو جیتے بغیر مدمقابل سے جیتنا کوئی معنی نہیں رکھتا. محض بحث سے کسی کا نقطہ نظر تبدیل نہیں کیا جاسکتا. لوگوں کی غالب اکثریت میں احساس برتری کی بھوک پائی جاتی ہے. جب تک آپ ان سے بحث کرتے رہیں گے وہ ڈٹ کر بڑے خوش و خروش سے آپ کا مقابلہ کر کے اپنی اس بھوک کی تسکین کرتے رہیں گے مگر جوں ہی آپ ان کی برتری کو تسلیم کریں گے انہیں اپنی انا کو بلند کرنے کا موقعہ دیں گے بحث ختم ہوجائے گی اور وہ آپ کے لئے ایک انتہائی ہم درد اور مہربان انسان کے طور پر سامنے آئیں گے.  چھوٹی موٹی تکرار میں کبھی دوست, شریک حیات, گاہک, ماتحت یا افسر سے ہار میں بھی آپ کی اصل کامیابی پنہاں ہے. بالکل اسی طرح کسی غلط فہمی کا خاتمہ بھی دلیل اور بحث سے ممکن نہیں. اس کے بجائے حکمت عملی, حسن سلوک, سمجھوتہ اور فریق مخالف کے نقطہ نظر کو سمجھنا زیادی اہمیت رکھتا ہے. اپنی غلطی مان لیجیے خواہ آپ خود کو بے قصور ہی سمجھتے ہوں. اس طرح چھوٹی سے چھوٹی کوتاہی کا اعتراف بھی سب کی نظر میں آپ کے قد میں اضافہ کے سبب بنتا ہے. لوگوں کو اپنا گرویدہ اور ہم خیال بنانے کا اولین اصول ہے کہ "آپ بحث و تکرار سے کبھی کامیاب نہیں ہوسکتے".

تحریر: شاہد حبیب ایڈوکیٹ

+923332472648