تعریف کریں قابلِ تعریف بنیں

 

 اشفاق احمد صاحب کہتے ہیں کہ ہم بہت اچھے لوگ ہیں ،پیارے لوگ ہیں ۔اچھی خوش بختی کا سامان مہیا کرتےہیں ایک دوسرے کے لیے لیکن تعریف و توصیف کے معاملے میں بخل سے کام لیتے ہیں۔ہمارے ہاں یہ رواج ابھی بن نہیں سکا اور ہم نے اس کے بارے میں غور نہیں کیا کہ تعریف وتوصیف بھی واجب ہے۔کہیں واجب نہیں ہے تو بھی کی جانی چاہیئے تاکہ انسانوں کے درمیان اتحاد اور ہم آہنگی اور ایک یونیٹی پیدا ہو۔بدقسمتی سے ہمارے ہاں آدمی کے چلے جانے کے بعد اس کی تعریف ہوتی ہے۔اگر آپ لاہور کے سب سے بڑے قبرستان میانی صاحب میں جا کر دیکھیں تو بہت سے کتبے آپ کو ایسے نظر آئیں گے جن کے اوپر مرحوم کا نام، تاریخ پیدائش،  تاریخ وفات لکھی ہوگی۔پھر اس کے ساتھ ساتھ توصیفی کلمات بھی ہوں گے اب وہ بے چارہ باہر نکل کر تو نہیں دیکھ سکتا کی کتبے پر کیا لکھا ہے،یہ تو اس کے کام نہیں آیا۔بہتر یہ تھا کہ اس کے ہوتے ہوئے اس کی کچھ تعریف و توصیف ہوجائےتو اس کو کچھ سہارا ہو اسکو پتا چلے کہ میرے اردگرد رہنے والے جو لوگ ہیں وہ بہت تقویت عطا کرنے والے لوگ ہیں۔

اپنے دور کے کامیاب ترین انسان ایمرسن کا قول ہے۔" جو شخص بھی مجھ سے ملتا ہے وہ کسی نہ کسی طرح مجھ سے بہتر ہوتا ہے۔جب میں اس شخص کی بہتری اور عظمت پر خوشی کا اظہار کرتا ہوں تو وہ شخص میرا دوست بن جاتاہے".اگر یہ طریقہ ایمرسن جیسے عظیم اور کامیاب انسان کے لئیے فائدہ مند تھا تو میرے اور آپ کے لیے کیوں نہ ہو گا؟

امریکی صدر ابراہیم لنکن نے ایک بار کسی کو اپنے خط کے آغاز میں لکھا "ہر انسان ستائش پسند ہوتا ہے۔"جان ڈیوی نے اہم بننے کی امنگ کو انسانی فطرت کی سب سے بڑی خواہش قرار دیا ہے۔انسانی خواہشات درحقیقت بہت محدود ہیں۔آپ اپنے لئے کل کائنات نہیں چاہتے اور انسانوں کی سبھی خواہشات عام طور پر پوری ہو جاتی ہیں۔مگر ایک خواہش جو نینداور خوراک جتنی ہی شدید ہوا کرتی ہے مگر اس کی تکمیل بمشکل ہو پاتی ہے۔اور یہ وہی خواہش ہے جسے جان ڈیوی اہم بننے کی امنگ قرار دیتا ہے۔ہم اپنے پیاروں کے جسموں کی پرورش کرتے ہیں۔لیکن ہم ان کے اعتماد اور خودی کی پرورش سے یکسر غافل رہتے ہیں۔ہم یہ یاد نہیں رکھ پاتے یا شاید یاد رکھنا نہیں چاہتے کہ لوگ تعریف حوصلہ افزائی اور داد و تحسین کے بھی ہمیشہ اتنے ہی بھوکے ہوا کرتے ہیں جتنا خوراک کے۔

یاد تو کیجیے گھر میں کھانے کے بعد ہم نے کب آخری بار پکانے والے یا پکانے والی کی تعریف کی تھی۔اپنے دفتر میں چائے کا پہلا یا آخری گھونٹ لے کر آفس بوائے سے "اچھی چائے کے لیے شکریہ "کب کہا تھا؟ ای میل یا بزنس لیٹر پر نظر ثانی کے بعد ڈرافٹنگ کے ذمہ دار کو ایکسیلینٹ جیسے مختصر مگر حوصلہ افزاء ریمارکس سے کبھی نوازا یا نہیں؟اگر واقعی ایسا کبھی نہیں ہوا یا آخری بار بہت طویل عرصہ پہلے ہوا تھا تو مان لیجئے کہ آپ نے دوسروں کا اعتماد خود ان کی اپنی ہی ذات پر نہیں بلکہ آپ کی اپنی ذات پر بھی کم کیا ہے۔آپ نے نہ صرف ان کی پیشہ ورانہ صلاحیتوں میں اضافے بلکہ ان کے دلوں میں اپنے لیے اچھے جذبات کو بھی پیدا ہونے سے روکا ہے اپنے چاہنے والوں میں اضافہ نہیں ہونے دیا۔درحقیقت شکریہ ادا کرنے سے آدمی خود مفرح ہوتا ہے۔،اور اسکی روح پر ،اور اس کے وجود پر،اور اس کی شخصیت پر،اور اس کی فردیت پر بہت اچھا اثر پڑتا ہے۔ آپ کی جانب سے دوسروں کی تعریف و توصیف اگر ان کی کارکردگی میں اضافے کا سبب ہوتی ہے تو یقین کیجئے یہ آپ کی شخصیت کو بھی اوروں کی نظر میں سحر انگیز بنا دیتی ہے۔جہاں کسی پر تنقید کرنا ناگزیر بھی ہو وہاں پہلے اس کی خوبیوں کی تعریف ضرور کیجئے کہ تعریف سننے کے بعد تنقید سننا زیادہ آسان ہوا کرتا ہے۔ایک بار دوران مطالعہ ایک خوبصورت جملہ نظر سے گزرا کہ نکتہ چینی کو کوئی پسند نہیں کرتا مگر نکتہ چینی کے انداز میں اگر آپ تھوڑی سی چینی بھی شامل کر دیں تو آپ کی عزت برقرار رہ سکتی ہے اور دوسرا شخص اپنی اصلاح بھی کر سکتاہے۔

اپنے وقت میں چالیس لاکھ ڈالر سالانہ تنخواہ پانے والے چارلس شواب کا کہنا تھا کہ اسے اتنی بڑی رقم محض اس لئے ادا کی جاتی ہے کہ وہ لوگوں سے برتاؤ کا طریقہ جانتا تھا "اس کا کہنا تھا کہ میرا سب سے بڑا سرمایہ میری وہ قابلیت ہے جس کے ذریعے میں لوگوں میں امنگ پیدا کرتا ہوں اور کسی شخص کے جوہر کو ابھارنے کا ایک ہی طریقہ ہے۔۔ تعریف اور حوصلہ افزائی۔  لوگوں میں کام کرنے کی تحریک پیدا کرنا میرا فرض ہے لہذا میں عیب جوئی سے نفرت کرتا ہوں۔ اگر مجھے کسی کسی کی کوئی بات پسند جائے تو میں جی بھر کے داد دیتا ہوں۔"

اس طرح کی شخصیت تعمیری کہلاتی ہے یہ لوگ دوسروں میں چھپی خوبیاں تلاش کرنے کی صلاحیت رکھتے ہیں ان کے نزدیک ہر فرد میں بہتری کی گنجائش ہمیشہ موجود ہوتی ہے اور ان خوبیوں کو پروان چڑھایا جا سکتا ہے۔انکی اس خوبی کی وجہ سے یہ لوگ ہر دلعزیز بنتے چلے جاتے ہیں۔لوگوں کو یہ یقین ہوتا جاتاہے کہ یہ شخصیت رکھنے والے ان کے ساتھ مخلص ہیں۔

ہم اپنے وقت کا 95 فی صد اپنے بارے میں سوچنے پر صرف کرتے ہیں جبکہ بقیہ 5 فی صد دوسروں کی خامیوں پر غور وفکر میں گزارتے ہیں 

آئیے اپنی توجہ اور وقت صرف اپنی ضروریات اور اوصاف کا جائزہ لینے پر خرچ کرنے کے بجائے اپنے اردگرد سبھی لوگوں کے اچھے اوصاف کو یاد کرنے ان کی خوبیوں کا تجزیہ کرنے اور ان کی تعریف کرنے پر مرکوز کرتے ہیں ۔خوشامد کی ہر گز ضرورت نہیں مگر خوبیوں پر داد و تحسین ان کا حق ہے۔اچھی صلاحیتوں کی ستائش کریں جی بھر کہ داد دیجئے  وہ آپ کے کہے الفاظ کو پسند کریں گے اور زندگی بھر ان الفاظ کی صورت میں آپ کو یاد رکھیں گے۔

شاہد حبیب ایڈوکیٹ

  + 923332472648